яңа китабы

Фәүзия Бәйрәмованың яңа китабы


  Узган елнын соңгы көннәрендә Казанда язучы-галим, җәмәгать эшлеклесе Фәүзия Бәйрәмованың “Туран Иле” дип аталган яңа китабы басылып чыкты. 336 биттән торган бу калын китапка аның соңгы елларда язылган фәнни-популяр язмалары тупланган, алар барысы да татар тарихына, милләтебезнең бүгенге тормышына карый. Бу хезмәтләрне язар өчен Фәүзия Бәйрәмова күп тапкырлар Себердә, Идел-Урал төбәкләрендә, Кавказ якларында, Төркиядә һәм Алманиядә һәм татарлар яшәгән бик күп җирләрдә булды, Казан, Петербург, Екатеринбург, Тубыл, Омски, Анкара, Мюнхен архивларында эшләде, милләттәшләребез белән йөзләгән очрашулар уздырды. Алай да, китапка кергән язмаларның күпчелеге Себер турында, китапның исеме дә аның борынгы атамасы буенча “Туран Иле” дип куелган, анда борынгы татар тарихы турында өр-яңа мәглүматлар бирелгән. Заманында Скифия, Тартария, Туран Иле дип йөртелгән Себер җирләренең төп татар туфрагы булганлыгын тарихчы Фәүзия Бәйрәмова күп санлы тарихи чыганаклар, археологик казылмалар, себер татарлары арасында яшәп килгән халык авыз иҗаты мисаллары буенча исбат итә.
  Себер турындагы язмалардан тыш, китапка “Кафтау итәгендә татарлар” /Карачай-Черкәс республикасы һәм Ставрополь крае/, “5 мең еллык Ахун һәм Аркаим” /Башкортстан һәм Чиләбе өлкәләре/, “Патша курганы һәм Татар тарихы” /Самара өлкәсе/, “Татар Караболагы – 50 ел үлем кочагында” /Чиләбе өлкәсе/, “Төркия: шәһәрләр һәм шәхесләр”, “Төркиядә татар авылы” /Төркия/, “Урал тауларында кырык сырт” /Магнитогорски/, “Утта яндырылган татар хатыны” /Екатеринбург/ һәм башка хезмәтләр кертелгән. Шунысын да әйтергә кирәк, бу Фәүзия Бәйрәмованың моңа кадәр басылып чыккан “Таралып яткан Татар Иле”, “Алтын Урдам – Алтын Җирем” дип аталган китапларының дәвамы булып тора, шушы темага язылган тулы бер циклны тәшкил итә.
  “Туран Иле” китабы 1000 данәдә дөнья күрде, тиржның бер өлеше Бөтендөнья татар конгрессы аша төбәкләрдәге милләттәшләребезгә бушка таратылачак, бер өлеше Чаллы шәһәренең татар китап кибетләрендә сатылачак.

  Тарихи-мәдәни мирас фондыныћ матбугат үзәге.

  2009 ел, 1 гыйнвар.

Вот первая часть.